AMETSA GAZTELEKUAK ASTELEHENETIK AURRERA ATEAK ZABALIK IZANGO DITU
Joan den asteartean, martxoak, 25, Ametsa gaztelekuaren inaugurazio ekitaldia izan zen. Orion gaztetxoentzako topaleku eta jolastoki bat sortzeko proiektua gauzatzen hasi da, eta datorren astelehenetik aurrera ateak zabalik izango ditu 10 urtetik 16ra bitarteko herriko gaztetxo guztientzat.
Astearteko ekitaldia Txurrumuskiko gazteek berek dantzatu zuten aurresku batek abiatu zuen, lokalaren kanpo aldean; ondoren, herriko apaizak eta alkateak hitzaren bidez babesa eskaini zioten elkarte berriari, eta Egoitz Eizagirrek bi bertso eder bota zituen. Borobiltzeko, Beņat Solaberrietak eskerrak eman zizkien Ametsa proiektu izatetik errealitate bihurtu arteko bidean Txurrumuskikoei lagundu dieten guztiei eta adierazi zuen denentzat zabalik daudela. Gero, denak barrura sartuta, lokala ikustearekin batera, edariak eta pintxo ederrak dastatzeko garaia izan zen.
Biharamunean, Ametsan monitore lanetan arituko diren gazteek bilera bat egin zuten bertaratu ziren gaztetxo guztiekin, haien gustuak, beharrak eta iritziak entzuteko eta denen artean gaztelekuaren martxaz jarduteko.
Hauexek dira Egoitzek Ametsari kantatu zizkion bertsoak:
Koskarik koska nuen txikitan
jolasik gustokoena
hainbeste koska pasata gero
ederra da garaipena
bidegurutze asko ta gero
hartu du bide zuzena
herri guztian babesarekin
askon lana ta kemena
nahiz ta hastea ez den erraza
bideko mila problema
azken finean gaur egia da
ametsa zirudiena.
Bi amets klase daude bizitzan
amestea da normala
batzuk ahaztu egiten dira
esnatu ta berehala
ta bizi gera inoiz eduki
ez bagenitu bezala
ta beste batzuk irauten dute
denbora igaro ahala
horien artean sartu behar da
gaur zabaldu den lokala
baina lokal huts izan ez dadin
ametsak iraun dezala.